Arrestohet Ilir Xhakja, i dyshuari për vrasjen e kryekomisarit Tahiraj

Është arrestuar në orët e para të ditës së sotme shtetasit Ilir Xhakja, i dyshuari për vrasjen e kryekomisarit Adem Tahiraj, dje në Katund Sukth të Durrësit. Forca të shumta policie rrethuan zonën ku ishte fshehur Xhakja, në fshatin Shenavlash të Durrësit, i cili në pamundësi për të çarë kordonin e policisë u vetëdorëzua, sipas policisë bashkë me armën e krimit.

Ilir Xhakja është i dyshuari kryesor për vrasjen e kryekomisar Adem Tahiraj, shefi i Komisariatit të Shijakut. 38 vjeçari është person me precedentë penale, i dënuar 21 vjet heqje lirie. Ngjarja e rëndë ndodhi ditën e enjte rreth orës 18:00, në Katund Sukth të Durrësit, ku u vra në krye të detyrës shefi i Komisariatit të Shijakut, Adem Tahiraj. Pas arrestimit priten të zbardhen detajet për këtë ngjarje, e cila dalë nga dalë po hedh shumë hije misteri për arsyet e vërteta.