Një vështrim historik dhe i hollësishëm në arkivat britanike do të gjendet në librin e Pranvera Telit, “Shqipëria dhe diplomacia angleze, 1919-1927”, botuar nga shtëpia botuese “Neriada”, duke sjellë fakte dhe ngjarje të panjohura deri tani për lexuesit e gjerë. Ashtu siç pohon edhe vetë autorja, qëllimi i këtij libri, i trajtuar nën dritën e burimeve arkivore angleze, është të japë një kontribut në fushën e historisë së Shqipërisë dhe veçanërisht në historinë e marrëdhënieve ndërkombëtare të saj. Duke vlerësuar rëndësinë shkencore e historike të kësaj teme për studiuesit e kësaj periudhe, autorja synon të kontribuojë në arritjen e një trajtimi sa më objektiv dhe të plotë të rrethanave ndërkombëtare, në të cilat u diskutua çështja shqiptare nga diplomacia e kohës, duke u fokusuar tek diplomacia angleze dhe përpjekjet e shtetit shqiptar për të mbijetuar në këto rrethana. Autorja shkruan në librin e saj se “shfrytëzimi i burimeve arkivore angleze të jep mundësinë që ta shikosh Shqipërinë dhe çështjen shqiptare me syrin e Londrës zyrtare dhe të përcjellësh tek lexuesi thelbin e vërtetë të trajtimit të Shqipërisë e rolit të saj në rajon në zyrat diplomatike të Britanisë së Madhe, që përfaqësonte lidershipin e politikave ndërkombëtare deri në përfundim të Luftës së Dytë Botërore”. Ndërkohë, që politika e jashtme italiane dhe jugosllave ndaj Shqipërisë dhe konflikti i interesave të tyre, për dominim në këtë pjesë të rajonit gjatë periudhës në fjalë, kanë tërhequr interesin e historianëve dhe kanë qenë më të studiuara dhe të njohura, nga historiografia shqiptare nuk ka punime te plota. Mes shumë ngjarjesh dhe zhvillimesh historike, nga moria e madhe e informacionit dhe fakteve lind pyetja, pse pikërisht diplomacia angleze? Nëse Shqipëria nuk kishte ndonjë rëndësi të madhe për politikën e Britanisë së Madhe në këtë periudhë, politika britanike kishte rëndësi të madhe për fatin e Shqipërisë. Me pozitën e saj të "arbitrit ndërkombëtar", për kohën Anglia luante një rol shumë të madh në formimin e strukturës politike të të gjithë Evropës, si në periudhën e parë të pas Luftës së Parë Botërore (kur dominonte Franca dhe sistemi i Versajës), ashtu edhe në periudhën e dytë, kur në skenën politike evropiane u shfaqën Gjermania dhe Italia. Përplasjet dhe faktet historike, herë në të mirë e herë në dëm të shtetit shqiptar, të gjitha këto të pasqyruara përmes dokumenteve zyrtare britanike, pasqyrohen në këtë studim të Pranvera Telit. Ky libër është cilësuar si një studim që hedh një tjetër dritë mbi vitet e dy luftërave botërore, që patën zanafillën në Ballkan.